پرێنسیپێکی گرینگ لە پێوەندی لە گەڵ قازانجی منداڵدا ئەوەیە کە منداڵ دەتوانێ بۆ خۆی لەو هەڵسەنگاندن و بەرنامەڕێژییانەدا بەشدار بێت کە کە پێوەندیی بەوەوە هەیە. دەبێ شتەکان بەو ڕادەیە بۆ منداڵ شی بکرێنەوە کە منداڵەکە خۆی تێبگات کە ئەو بڕیارەی دەدرێ پێوەندیی بە چ شتێکەوە هەیە و بۆچی بڕیاری وا دردەکرێت. ئەمەش بەو مەبەستەی کە ئەو بتوانێ بۆچوون و روانگەی خۆی سەبارەت بە کێشەکە دابڕێژێت و دەری ببڕێت. هەر کەسێک، بە منداڵیشەوە، هەردەم مافی ئەوەی هەیە کە بەشداری لەو قسەوباس و هەڵسەنگاندنانەدا بکا کە سەبارەت بەو دەکرێن. لەم پێوەندییەدا، تەمەن هیچ دەورێک نابینێ. دەبێ لە کاتی گوێگرتن لە منداڵ و بۆچوون و ئاواتەکانیدا، تەمەن و ئاستی گەشەی ئەو لەبەرچاو بگیردرێن. بۆ نموونە رێگایەک بۆ تێگەیشتن لە هەست و ویستی منداڵی بچکۆلە، وردبوونەوە لە شێوەی هەڵسوکەوت و یاری و گەمەی منداڵەکەیە. سەبارەت بە منداڵی گەورەش، دەبێ کارمەندەکان بە شیوەیەک شتەکانی بۆ باس بکەن کە ئەو بتوانێ تێیان بگات.

زانیاریی زیاتر

بە گوێرەی یاسا، منداڵێک کە تەمەنی ١٢ ساڵی پڕ کردبێتەوە، لە کاتی هەڵسەنگاندنی منداڵپارێزیدا دەسەڵاتی قسەکردنی هەیە. دەسەڵاتی قسەکردن بەو مانایەیە کە لە کاتی هەڵسەنگاندن سەبارەت بە منداڵپارێزیدا، دەبێ راوبۆچوونی منداڵیش بە هەمان شێوەی راوبۆچوونی گەورەساڵان، لەبەرچاو بگیردرێت. منداڵ دەبێ مافی ئەوەی هەبێ کە ئەو بەڵگەنامانە ببینێ کە پێوەندییان بەوەوە هەیە و، بەهەمان شێوە لە کاتی بڕیاردان سەبارەت بەو دا، دەبێ بە شێوەی فەرمی گوێ بۆ قسەکانی ئەویش بگیردرێت. منداڵ دەتوانێ داوای یارمەتی بکا، دەتوانێ داوای خزمەتگوزاری بکا و هەروەها ناڕەزایەتی خۆشی نیشان بدا بەرامبەر بەو بڕیارانەی سەبارەت بەو دراون. دەبێ سەبارەت بەو بڕیارانەی لەپێوەندی بە منداڵدا دراون، زانیاری بە منداڵەکە بدرێت و ئیمکانی ئەوەشی بۆ بڕەخسێندرێ کە سکاڵا بکا بەرامبەر بەو بڕیارانە. هەڵبەت، ئەوەی کە منداڵ بەشداری لەو هەڵسەنگاندنانەدا دەکا کە لە پێوەندی لە گەڵ ئەودا دەکرێن، بەو مانایە نیە منداڵ مافی ئەوەی هەبێ بۆ خۆی بڕیار دەربکا. ئەوە گەورەساڵانن کە ئەرکی ده‌رکردنی بڕیاره‌کانیان ده‌که‌وێته‌ سه‌ر شان و هه‌روه‌ها ده‌بێ له‌ به‌رپرسیاریه‌تیش به‌رامبه‌ر به‌ ئاکامی بڕیاره‌کان بگرنه‌ ئه‌ستۆ.