ئاننا بەبێ ئاسایش پەروەردە دەبێت

کاتێک دایک و باوکى ئاننا گواستیانەوە بۆ فینلەند، ئاننا بچووک بوو. باوکى لە فینلەند لە بوارى خانوبەرەدا کارى دەستکەوت. دایک و باوکى لە وڵاتى خۆیان بێ کار بوون و ماددە هۆشبەرەکانیان زۆر بەکاردەهێنا. باوکى لە فینلەندا کەوتە کۆمەڵێکەوە، کە ماددە هۆشبەرەکانیان بەکاردەهێنا و کڕینی و فرۆشتنیان دەکرد.

کاتێک کە ئاننا تەمەنى هێشتا 3 ساڵان بوو، چەند جارێک جێگۆڕکێی بە پەلەی بۆ خانەى منداڵان. پێکرابوو. هۆکاری ئەو جێگۆڕکێیانە ئەو دەنگەدەنگە بەرز و توندوتیژاوییەوە بوو کە دووپات دەبوونەوە و درواسێکانی خێزانەکەی ناچارکرد کە لە بەر خەمی کچە بچووکەکە، دەستی تێ وەربدەن. لەو بارودۆخانەدا دەرکەوت، کە ئاننا بەخراپى بەخێوکراوە و منداڵێکى زۆر ترسنۆکە. کارمەندى کۆمەڵایەتى لە بواری منداڵپارێزیدا کەوتە یارمەتی دانی خێزانەکە و بۆ ئەوەی یارمەتی دیکەش بدرێن، چەند رێنمایێکی پێشکەش بە دایک و باوکەکە کرد. بەلام دایک و باوکەکە نەیاندویست یارمەتى وەربگرن بەڵکو هەروا بەردەوام بوون لە بەکارهێنانى ماددەى هۆشبەر. ماڵی ئاننا شوێنێکی ئەوەندە نائەمن بوو بۆ ئەو، کە ئیتر مەجالێک بۆ هێنانەوەی ئەو لە خانەی منداڵانەوە بۆ ماڵەوە نەبوو.

ئاننا ماڵێک نیە لێی جێگیر بێت

کاتێک کە ئاننا تەمەنى 4 ساڵ بوو، خێزانێکى جێگرى فینلەندى دۆزرایەوە بۆى، کە ووردە ووردە ئاننا پێیان ئاشنا بوو. ئەو لە پێشدا پشووەکانى هەفتەى لەگەڵیاندا دەبردە سەر و لە کۆتاییدا بەتەواوەتى گواستیەوە لاى ئەوان بۆ ژیان. چەند چاوپێکەوتنێک بۆ دایک و باوکی ئاننا رێک خرا، بەڵام باوکى هەرگیز نەهات بۆ هیچ چاوپێکەوتنێک و دایکیشى بەدەگمەن دەهات. کاتێ کە ئاننا تەمەنى 5 ساڵ بوو، باوکى بە هۆی بە زیاد بەکارهێنانى ماددەى هۆشبەرەکان، مرد. لەم بارودۆخەدا دایکى ئاننا ویستى چاکببێتەوە. ئەو وازى لە بەکارهێنانى ماددەى هۆشبەر هێنا و هیواخوازبوو کە کچەکەى بگەڕێتەوە بۆ ماڵەوە. کارمەندەکانى کۆمەڵایەتى دەستیانکرد بە کارکردن لەگەڵ خێزانى جێگر و دایکەکەدا بە مەبەستى بەرەوپێشبردنى رەوتی گەڕانەوەى کچەکە بۆ ماڵەوە.

بارودۆخەکە بۆ ئاننا، بۆ دایکى و بۆ خێزانە جێگرەکەش، زۆر سەخت بوو. یەکێک لەو سەختیانە ئەوە بوو کە ئاننا هەستی بە نامۆیی دەکرد لە گەڵ دایکیدا، قسەکردنی بە زمانی دایکیشی بۆی زەحمەت بوو. هەرچەند لەو زمانە تێ دەگەیشت بەڵام حەزی لێ نەبوو قسەی پێ بکا.

لەو بارودۆخەدا ئاننا بووە منداڵێکی تەریک کەوتوو، خەمبار و کەمدوو. دایک و باوکى جێگر نەیاندەتوانى پەیوەندى لەگەڵ ئاننادا دروست‌بکەن، ئەوەش ببووە مایەی دەردیسەری بۆ خێزانەکەیان. هەروەها منداڵى بایەلۆژى خێزانە جێگرەکەش کە کەمێک لە ئاننا گەورەتربوو، تووشی جۆرێک لە قەیران بوو و، هەستی ئێرەیی و غیرەی بەرامبەر بە ئاننا لادروست ببوو. ئەوە بوو ئاننا گوازرایەوە بۆ خانەى منداڵان کە پێی ئاشنا بوو، وا بەڵێن بوو کە لەوێوە ئامادەکارى بکرێت بۆ گەڕانەوەى ئاننا بۆ ماڵەوە.

ئاننا کەم کەم لە تەمەنى شەش ساڵى نزیک دەبووەوە و لەو سەردەمەدا کۆتاییەکانی هەفتە و کاتەکانى پشووى لەلاى دایکى دەبردەسەر. ووردە ووردە دەرکەوت کە دایکى ئاننا لە گەڵ پیاوێکى تر ناسیاوی پەیداکردووە، کە بەتایبەتى پشووەکانى هەفتە مەشرووبی زۆر دەخواتەوە. ئەو پیاوە لە کاتی بەدمەستیدا هەم بەرامبەر بە دایکی ئاننا و هەم جارجار بەرامبەر بە ئانناش توندوتیژیی ئەنجام دەدا. دایکى نەیدەویست واز لە پیاوەکە بهێنێت بۆیە وازى لەو خەونەى هێنا کە ئاننا بگەڕێتەوە بۆ ماڵەوە.

لە خێزانى جێگردا، ماڵێکى ئەمن بۆ ئاننا دابین دەکرێت

کارمەندەکانى منداڵپارێزی و خانەى منداڵان هیواخوازبوون کە خێزانێکى جێگرى باش بۆ ئاننا بدۆزرێتەوە، لەبەرئەوەى ئەو هێشتا کچێکى بچووک بوو، هەرچەندە لە ژیانیدا زۆرى چەرمەسەری بینیبوو. هەروەها دایکى ئانناش ئەم جارە هەڵوێستى باشتری بوو سەبارەت بەوەى کە ئاننا بخرێتە خێزانێکى جێگرەوە. ئەو بە ئاشکرا ڕایگەیاند کە هێز و تواناى ئەوەی نیە کە ژیانێکی رۆژانە لەگەڵ کچەکەیدا بەسەر ببات.

لە تەمەنى 6 ساڵیدا ئاننا لەگەڵ خێزانێکى جێگر ئاشنایەتی پەیدا کرد و گواستیەوە لای ئەوان بۆ ژیان. دایکى ماڵەکە خەڵکى هەمان وڵات و نزیک ناوچەی زێدی دایکی ئاننا بوو. لە خێزانەکەدا کچێکى 13ساڵ و کچێکى 9 ساڵ هەبوون، کە دایکیان هەمیشە بەزمانى خۆیان لەگەڵیاندا دەدوا. دایکى خێزانە جێگرەکە یەکسەر پەیوەندیەکى باشى دروستکرد چ لەگەڵ ئاننادا و چ لەگەڵ دایکى ئاننادا، کە ئەویش هەروا ڕازى بوو لەم خێزانە جێگرە تازەیە. ئەوەش ئاشکرابوو کە ئاننا لە وڵاتەکەى خۆیان نەنکێکی، دایکی‌دایکی هەیە کە لەماوەى ئەو ساڵانەدا زۆر پەرۆشی حاڵی ئاننا بووە و زۆریش یادی کردووە. ئەوەبوو خێزانە جێگرەکە هاوکات لە گەڵ سەفەرکردنیان بۆ وڵاتی خۆیان و سەردانی کەس و کاریان، دەچوونە سەردانی دایەگەورەی ئانناش.

ئاننا بە شێوەیەکى ڕێک و پێک دایکى دەبینێت

ئێستا ئیتر ئاننا 10ساڵانە و قوتابیەکى گورجوگۆڵیشە. بەباشى بە دوو زمان دەدوێ. چاوپێکەوتنەکان لەگەڵ دایکیدا بۆ ئاننا گرنگن، هەرچەندە هەمیشە بەپێی پلانی بۆداڕێژراو، نایەنەدی.

ئێستا ئاننا سێ ماڵە نەنکىیشی هەیە: یەکێک لە فینلەند و دوانیش لە وڵاتى خۆى. کارمەندانى کۆمەڵایەتى واى مەزندە دەکەن، کە زمانى دایکیى هاوبەش لەگەڵ دایک و خوشکە جێگرەکاندا یارمەتیدەری ئاننا بووە، کاتێک کە لەگەڵ ئاننادا باس لە بەسەرهات و هەست و نەستى کراوە. هەروەها لە سایەى زمانێکى هاوبەشدا، هاوکاری لە گەڵ کەس‌وکاری دایکی ئانناش ئاسانتر بەدەستەوە هاتووە.