ناکۆکیەکان خراپتردەبن

خێزانەکە پێکهاتبوو لە دایک و باوک، کچێکى 3 ساڵان و کوڕێکى 9 ساڵان. خێزانەکە 2 ساڵ لەمەوبەر هاتن بۆ وڵاتى فینلەند. خۆگونجاندن هەروا ئاسان نەبوو، هەر بۆیە هەندێ جار بارودۆخی ناو خێزانەکە گرژ دەبووەوە. زمانى فینلەندى قورس بوو. خێزانەکە کێشەى ئابووریان هەبوو. باوکیان کارى نەبوو، ئەوە لە کاتێکدا کە پێشتر بەهۆی کارەوە بژێویى خێزانەکەى دابینکردبوو.

ڕۆژێکیان شەڕ و ئاژاوەیەکی قورس لە ناو ماڵدا رووی دا. دەنگى هاوار و هاڕەی شکانی کەلوپەلەکانى ناو ماڵ دەگەیشتە ماڵە دراوسێکان. یەکێک لە دراوسێکان تەلەفۆنى بۆ پۆلیس کرد و لە ئەگەری توندوتیژیى لە خێزانەکەدا، ئاگاداری کردنەوە. مەفرەزەى پۆلیس هات بۆ لێکۆڵینەوە لە بارودۆخەکە. شەڕ و هەرا کۆتایی پێ هێندرا، بەڵام پۆلیس بەشی منداڵپارێزیی لە رووداوەکە ئاگادارکردەوە .

لە فینلەند توندوتیژیى خێزانی بە پێی یاسا قەدەغەیە

دایک و باوکەکە و منداڵەکان بانگهێشتن کران بۆ فەرمانبەرایەتى کۆمەڵایەتى بۆ چاوپێکەوتن لەگەڵ کارمەندى کۆمەڵایەتیدا . لە چاوپێکەوتنەکەدا باس لە شەڕوهەرای ناو خێزانەکە و هۆکارەکانى کرا. دایک و باوکەکە ڕانەهاتبوون بە گفتوگۆکردن سەبارەت بە شتى تایبەتى نێوان خۆیان لە گەڵ کاربەدەستاندا، بۆیە بەکارمەندەکەیان ڕاگەیاند کە هەموو شتێک لە خێزانەکەدا، باشە و کێشەیەک نیە. بۆ ئەوان ئاسانتر ئەوە بوو کە باس لەوە بکەن کە پارە چەند بەسەختی بەشیان دەکات یان ئەوەی کە کار چەند بە سەختی دەدۆزرێتەوە.

کارمەندى کۆمەڵایەتییەکە باسى لەو خزمەتگوزارییانە کرد بۆ دایک و باوکەکە، کە بۆ خێزانى منداڵدار تەرخان کراون. جگە لەمە کارمەندى کۆمەڵایەتییەکە جەختى لەسەر ئەوە کردەوە، کە هەرچەند پەروەردەى منداڵ بەپلەى یەکەم ئەرکى دایک و باوکە، بەڵام لە هەندێ شتدا یاسا باڵادەستە. توندوتیژیى ناو خێزان لە فینلەند، بەپێى یاسا تاوانە و لێدانى منداڵ و تەمێکردنى جەستەیى منداڵیش لە یاساى فینلەنددا، قەدەغەکراوە. دایک و باوکەکە ژمارە تەلەفۆنەکانى ئێشکگریی کۆمەڵایەتى و خانەى پاراستنیان وەرگرت، بۆ ئەو کاتەی کە هات و شەڕوهەرای مەترسی خوڵقێن، سەری هەڵدایەوە.

وندوتیژیى خێزانی دەستتێوەردانی بەدوادا دێت و، دەکرێ لە بەرامبەریدا داوای یارمەتیش بکرێت

بارودۆخی ناو خێزانەکە هێمن بۆوە، هەتا لە دواى چەند مانگێک بەهۆى پسوڵەیەکى گەورەی تەلەفۆنەوە، دیسان کێشەکان بەرەو گرژبوونەوە چوون. پارە خەریک بوو تەنانەت بەشى خواردنیشى نەدەکرد. باوکەکە توڕەببوو، و لە کاتى توڕەبووندا لە دایکەکە و کوڕە 9 ساڵەکەى دابوو. دایکەکە و منداڵەکان ترسان لە جەرگەی شەڕەکەدا هەستان و ماڵیان بەجێهێشت. چوون و داوایان لە دراوسێکەیان کرد، کە لەجیاتى ئەوان تەلەفۆن بۆ خانەى پاراستن بکات.

دایکەکە و منداڵەکان چوون بۆ خانەى پاراستن. لەوێ سەرەتا هێمن بوونەوە و هاتنەوە سەر خۆ. لە پاشان کارمەندەکانى خانەى پاراستن لەگەڵ کارمەندە کۆمەڵایەتیەکانى منداڵپارێزیدا دەستیانکرد بە لێکۆڵینەوەى بارودۆخى خێزانەکە و لەوەی کە ئاخۆ بە چ شێوەیەک دەتوانن یارمەتییان بدەن. سەبارەت بەو دۆخەی کە توندوتیژی تێدا ئەنجام درابوو، هەم لە گەڵ دایکەکە و هەم لە گەڵ منداڵەکاندا قسەکرا. لە ناو قسەوباسەکاندا پێ لە سەر ئەوە داگیرا کە پێویستە کارمەندانی کاروباری کۆمەڵایەتی ئەرکی خۆیان بەجێ بگەیێنن. لەوانەیە دایک و باوکەکان پێیان وابێ کە کاروباری ناو ماڵ پێوەندیی بەکەسانی دەرەکییەوە نیە. لەهەرحاڵدا، لە وڵاتی فینلاند، ئەرکە لە ئەستۆی کاربەدەستان، کە لە کاتی پێویستدا دەستتێوەردان بکەن. لە دواى گفتوگۆکان باوکەکە قایل بوو بەوە کە چاوی بەو فرمانبەرە بکەوێت کە، شارەزای کارکردن لە گەڵ ئەو پیاوانە بوو کە توندوتیژییان ئەنجام دابوو.

سەردان و چاوپێکەوتنەکانی کارمەندى کۆمەڵایەتى منداڵپارێزی و دیداری خێزانەکە هەتا چەند مانگێک هەروا بەردەوام بوو. لەماوەى کارى هاوبەشدا بەشێوەیەکى بەرچاو یارمەتى دایک و باوکەکە درا لە جێبەجێکردنى کارەکاندا. کارمەندى کۆمەڵایەتى یارمەتى دایکەکەى دا لە چوون بۆ خولى فێربوونى زمانى فینلەندى و داواکردنى باخچەى ساوایان بۆ منداڵە بچوکەکەى خێزانەکە. هەروەها کارمەندى کۆمەڵایەتى ڕێنمایى خێزانەکەى کرد بۆ گەڕان بەدواى ئارەزوویەکدا بۆ منداڵە 9 ساڵانەکەى خێزانەکە. کوڕەکە دەیویست یارى تۆپى پێ بکات، فەرمانبەرایەتى کاروبارى کۆمەڵایەتىش پارەى بۆ هاتنەدیی ئەو ئارەزووەی بۆ دابین کرد. باوکەکە بەردەوام بوو لە هاتوچۆکردنى گرووپى گفتوگۆکردن بۆ پیاوان و، هەروەها دەستی کرد بە خوێندن لە خولی فێرکاری بەمەبەستی چوونەسەرکار.