ماف و ئه‌رکه‌کانی دایك و باوك له‌ وڵاتی فینلاند، به‌ شێوه‌یه‌کی یه‌کسان دیاری‌کراون. دایك و باوك هه‌م مافه‌ و هه‌م ئه‌رکه‌ له‌ سه‌ر شانیان که‌ باشگوزه‌رانی بۆ منداڵی خۆیان دابین بکه‌ن. ئه‌رکی سه‌رشانی دایك و باوکه‌ که‌ منداڵی خۆیان له‌ ژینگه‌یه‌کی هێمنانه‌ و هانده‌رانه‌دا په‌روه‌رده‌ بکه‌ن و پێیان رابگه‌ن و هه‌روه‌ها، زه‌مینه‌ی‌ خوێندنێکی گونجاویشی بۆ ده‌سته‌به‌ر بکه‌ن. ته‌مێکردنی جه‌سته‌یی به‌ بیانووی په‌روه‌رده‌کردنه‌وه‌، له‌ فینلاند قه‌ده‌غه‌یه‌ وە بەکارهێنانی هەر شێوەیەك لە شێوەکانی زەبروزەنگ بەرامبەر بە منداڵ تاوانە. ده‌بێ منداڵ له‌ که‌شێکی تێکه‌ڵ به‌ تێگه‌یشتن و ئاسایشی و هه‌ست و سۆزدا په‌روه‌رده‌ بکرێت.

به‌شێوه‌ی باو، دایك و باوك مافی ئه‌وه‌یان هه‌یه‌ منداڵی خۆیان به‌خێو بکه‌ن، په‌روه‌رده‌ی بکه‌ن، شوێنی نیشته‌جێبوونی دیاری‌بکه‌ن و بڕیار له‌ سه‌ر کاروباره‌کانی دیکه‌ی منداڵه‌که‌ش بده‌ن. هه‌ڵبه‌ت، له‌ کاتی دانی ئه‌و بڕیارانه‌دا ده‌بێ خواست و بۆچوونی منداڵه‌که‌ش له‌ به‌رچاو بگیردرێت. له‌و حاڵه‌تانه‌ی منداڵپارێزیدا که‌ یارمه‌تییه‌کانی بەشی چاودێریى کۆمەڵایەتى ئازاد پێشکه‌ش به‌ خێزان ده‌کرێ، مافی بڕیاردان له‌ سه‌ر تێکرای کاروباره‌کانی منداڵ بۆ دایك و باوکه‌که‌ی به‌پارێزراوی ده‌هێڵدرێته‌وه‌. مەبەست لە کاروباری یارمەتیەکانی چاودێری ئازاد رێکخستنی ئەو خزمەتگوزاریانەیە، کە پشتیوانی و یارمەتی منداڵ دەدەن کاتێك کە لە ماڵەوە دەژین.  پرێنسیپی یاسایی ئه‌وه‌یه‌ که‌ ده‌ستتێوه‌ردان له‌ کاروباری منداڵدا ده‌بێ به‌ هاوکاری له‌ گه‌ڵ دایك وباوك بێت. بڕیاردان له‌ سه‌ر بیروبڕوا و په‌روه‌رده‌ی ئایینی منداڵ مافێکی پارێزراو بۆ دایک و باوکه‌کانه‌.

ئه‌وه‌ی که‌ منداڵ بخرێته‌ ژێر سەرپەرشتیى کاربەدەستان یان جێگۆڕکێی پێ بکرێت، به‌ هیچ شێوه‌یه‌ک مانای‌ کۆتاییهاتن به‌ دایکایه‌تی و باوکایه‌تی ناگه‌یێنێت. ئه‌وه‌نده‌ی هه‌یه‌ که‌ له‌و حاڵه‌تانه‌دا ده‌سه‌ڵاتی بڕیاردانی دایک و باوک به‌رته‌سکتر ده‌بێته‌وه‌. دایک و باوک هه‌روا وه‌ک سه‌رپه‌رشتی منداڵ ده‌مێننه‌وه‌، به‌ڵام ناوه‌ندی کۆمه‌ڵایه‌تیی سه‌ر به‌ شاره‌وانی بڕیار له‌ سه‌ر شوێنی نیشته‌جێبوون، به‌خێوکردن، په‌روه‌رده‌ و پێڕاگه‌یشتنی منداڵه‌که‌، ده‌دا. له‌و حاڵه‌شدا هێشتا هه‌وڵ ده‌درێ که‌ بڕیاره‌کان به‌ هاوکاری له‌ گه‌ڵ دایک‌وباوک بدرێن. له‌ کاتی خستنه‌ژێر سه‌رپه‌رشتی کاربه‌ده‌ستان یان جێگۆڕکێی به‌په‌له‌شدا، دایک و باوک مافی ئه‌وه‌یان هه‌یه‌ که‌ له‌ کاروباری پێوه‌ندیدار به‌ منداڵی خۆیان ئاگادار بن و له‌گه‌ڵی له‌ پێوه‌ندیدا بن. دایک و باوک هه‌روه‌ها مافی ئه‌وه‌شیان هه‌یه‌ که‌ بزانن ئاخۆ چی سه‌باره‌ت به‌وان نووسراوه‌ و ئه‌و کارانه‌ش که‌ کراون به‌ چ هۆیه‌ک و له‌ سه‌ر چ بنه‌مایه‌ک بوون.

دایك وباوك هه‌میشه‌ ئه‌و مافه‌یان هه‌یه‌ که‌ بیروڕای خۆیان سه‌باره‌ت به‌ رێوشوێنه‌کانی منداڵپارێزی ده‌رببڕن. جاری وایه‌ روانگه‌ی دایک‌وباوک له‌ گه‌ڵ جۆری منداڵپارێزییه‌که‌، ناته‌بایه‌. ئه‌وه‌ یاسایه‌ که‌ دیاریکردووه‌ ئاخۆ بڕیاری فه‌رمی سه‌باره‌ت به‌ پرسه‌که‌ ده‌بێ که‌ی بدرێ و کێ بیدا. هه‌ر له‌ یاسادا ئه‌وه‌ش هاتووه‌ که‌ ئایا ئه‌کرێ داوای پێداچوونه‌وه‌ به‌ بڕیاردا بکرێت یان نا. بۆ نموونه‌ بڕیاری خستنه‌ژێر سه‌رپه‌رشتیی کاربه‌ده‌ستان یان بڕیاری جێگۆڕکێی به‌په‌له‌ له‌و جۆره‌ بڕیارانه‌ن که‌ دایک‌وباوک ئه‌توانن سکاڵایان به‌رامبه‌ر به‌رزبکه‌نه‌وه‌. سکاڵا ده‌بێ له‌ ماوه‌ی 30 رۆژ دوای کاتی پێڕاگه‌یاندنی بڕیاره‌که‌دا، به‌رزبکرێته‌وه‌. ئه‌رکه‌ له‌ ئه‌ستۆی کاربه‌ده‌ستان که‌ دایک‌وباوکه‌کان له‌ مافه‌کانیان ئاگاداربکه‌نه‌وه‌. ئه‌گه‌ر دایک‌وباوک پێیان وابێ که‌ خراپیان هه‌ڵسوکه‌وت له‌گه‌ڵ کراوه‌، ئه‌وان مافی ئه‌وه‌یان ده‌بێ که‌ پێوه‌ندی به‌ کاربه‌ده‌ستی باڵای بواری کۆمه‌ڵایه‌تی شاره‌وانییه‌که‌یانه‌وه‌ بکه‌ن