ڕێگاکانی یارمەتی چارەسەری ئازاد

زۆرجار لە پێوەندی لە گەڵ منداڵپارێزیدا ترسی ئەوە هەیە، کە منداڵ لە خێزانەکەی بسەندرێتەوە. لە ڕاستیدا هەمیشە هەوڵی ئەوە دەدرێت کە یارمەتی منداڵەکە بدرێت، کە بتوانێت لە ماڵەکەی خۆی لەگەڵ بنەماڵەکەیدا بژی. ئەگەر دۆخی منداڵەکە و خێزانەکەی پیویستی بە یارمەتی دەرەکی هەبێ، وەك پرنسیپێکی بنەڕەتی کارێك دەکرێت کە هەمیشە سووکترین ڕێگاى ڕەخساو بۆ یارمەتى خێزانەکە بگیرێتەبەر. لە منداڵپارێزیدا بەم جۆرە خزمەتگوزارییانە کە بە پلەی یەکەم هەوڵیان بۆ دەدرێ، دەگوترێ ڕێگاکانی یارمەتی چارەسەری ئازاد. رێگاکانی یارمەتی چارەسەری ئازاد هەمیشە ئارەزوومەندانەیە و لەسەر بنەمای هاوکاری لەگەڵ خێزاندا بنیاتنراوە. بەشى هەرەزۆری کارەکانى منداڵپارێزی، بەشێوەی یارمەتی چارەسەری ئازاد ئەنجام دەکرێت.

رێگاکانی یارمەتی چارەسەری ئازاد دەتوانێ بەشێوەی جۆراوجۆر بێت و لە شوێنێکەوە بۆ شوێنیکی تر دەگۆڕێت. ئەوانە دەکرێت بۆ نموونە بەم شێوانە بێت:

خزمەتگوزاری ماڵەوە

خزمەتگوزاری ماڵەوە بە کردەوە دەکرێت بۆ نموونە یارمەتی پێڕاگەیشتنی منداڵ بێت، خواردن دروست کردن بێت، جل وبەرگ شتن بێت یان پاك وخاوێن کردنەوە بێت. مەبەستیش لەم کاروبارانە بەهێزکردنی باشگوزەرانی بنەماڵەکانە و رێگاگرتن لە هاتنە پێشەوەی گیروگرفتەکان.

یارمەتی کاروباری خێزان راستەوخۆ بۆ ماڵەوە

کاروباری خێزان پێدەچێت قسەوباس بێت، ڕاوێژ و یارمەتی دانی دایك باوك بێت لە پەروەردەکردندا. هەروەها دەتوانێ یارمەتیدانی خێزان بێت لە کاروباری رۆژانەدا، وەك ئەنجامدانی هەندێ بابەت یان ئەنجامدانی کاروباری ماڵەوە یان رێکخستنی هەندێ کاروچاڵاکیە کە یارمەتی باشگوزارەنی منداڵ دەکات.

کەسی پشتیوان یان خێزانی پشتیوان

منداڵ یان خێزان دەتوانێت کەسێکى پشتیوان یان خێزانێکى پشتیوانى هەبێت. کەسى پشتیوان، کەسێکی گەورەساڵە، کە بۆنموونە بۆ ئەنجامدانی ئەرکەکانی فێرگە یارمەتیدەر دەبێت یاخود لە کاتی بەجێگەیاندنی سەرگەرمیەکاندا هاودەمی منداڵەکە دەبێت. خێزانى پشتیوان خێزانێکى ئاساییە، کە منداڵەکە دەتوانێت بەپێى ڕێکەوتن بچێت بۆلایان بۆ نموونە لە رۆژەکانی کۆتایی هەفتەدا. کەسە پشتیوانەکان یان خێزانە پشتیوانەکان لەسەر کارەکانیان ڕادەهێنرێن.

چالاکی گروپی هاوتایی

مەبەست لە چالاکى گرووپى هاوتایی ئەو گروپانەن، کە دەتوانی بچینە ناوەوە بۆ قسەوباس کردن لەس بابەت و پرسی جۆراوجۆر لەگەڵ کەسانێکدا کە لە هەلومەرجێکی وەکیەکدا ژیان بە سەر دەبەن. زۆربەی کەس و کار و دۆست ورەفیقی دایك و باوکە کۆچبەرەکان دوور لەوان دەژین، بۆیە دەکرێ لە جێی ئەوە، ئەوان لە یانەو گروپەکانی تردا خەڵکی تر ببینن. بەگشتى لەو یانە و گروپانەدا چالاکی وەک خواردن دروستکردن، کارى دەستی یان کاری دیکەی ئەوتۆ ئەنجام دەدرێ کە مرۆڤ دەتوانێ لە کاتی پشوودا لەگەڵیاندا قسەوباس بکا و ئاشنا ببن بەیەکتری.

خزمەتگوزاریەکانی پێڕاگەیشتن و چارەسەری

ئەگەر بۆ سەرپێخستنەوەی منداڵ پێویست بە خزمەتگوزاریی وەک پەرستاری و چارەسەری هەبێت، پێویستە ئەو خزمەتگوزارییانەی بۆ رێكبخرێت. ئەگەر منداڵ کێشەی لە توانایی فێربووندا هەبێت، دەروونناس و توێژەری کۆمەڵایەتی فێرگە دەتوانن بە مەبەستی بەهرەمەندبوونی لە خزمەتگوزاریی پێویست، رێنوێنی بکەن.